Fifidianana 2018 Mila hajaina ny fe-potoana, hoy ny Kmf

Cnoe

Politique
Sabotsy 09 Septambra 2017

Manahy ny fizotran’ny fanomanana ny fifidianana hotanterahana amin’ny taona ho avy ny Kmf/Cnoe (Komitim-pirenena Mpanara-maso ny Fifidianana).

Hita soritra sahady mantsy ny fahasahiranan’ny CENI (Commission Electorale Nationale Indépendante) eo amin’ny lafiny tetibola raha ny zava-misy ankehitriny, hoy ity firaisamonim-pirenena ity. Miandry fotsiny ny sitrapon’ny fahefana mpanatanteraka sy ireo mpamatsy vola iraisam-pirenena io rafitra nasionaly lazaina ho mahaleotena io. Napetraka ny Sacem (Soutien Au Cycle Electoral Malgache) ny taona 2013 ho famoahana an’i Madagasikara tao anatin’ny krizy lavareny. Mbola miantehitra tanteraka amin’izany tetikasa izany ihany anefa ny fanjakana Malagasy mandritra ny taona 2017 hatramin’ny taona 2019. Fihetsika toa midika ho fiankinan-doha amin’ny sehatra iraisampirenena. Tranga efa misongadina eto amin’ny firenena ihany koa ny fampielezan-kevitra mialoha ny fotoana ho an’ireo kandida sasantsasany, hoy ny ny Kmf/Cnoe. Vahaolana ny fampitomboana ho 3 volana ny fanaovana propagandy ao anatin’ny fehezan-dalàna vaovao hifehy ny fifidianana. Mila hajaina kosa ny fe-potoan’ny fifidianana amin’ny taona 2018 eto Madagasikara, araka ny fanehoan-kevitry ny fikambanana.

Nangonin-dRamano F.