Politique

Partagé sur :
• facebook

Fanapotehana ny firenena, famonoana ny mpiray tanindrazana ary fivarotan-tanindrazana no nisongadina tao anatin’ny 2 taona sy tapany nitantanan’ny fitondrana mijoro ankehitriny.

 Tsy azo ekena intsony ny fanaovana rapadango ny volam-bahoaka, ny kolikoly avo lenta, ny fivoahan’ny harem-pirenena miaraka amin’ny varoboba ny tany sy faritra maro eto Madagasikara, hoy ireo fikambanana sy vondrona avy amin’ny sehatra samihafa naneho hevitra ampahibemaso teny amin’ny Astauria Antanimena omaly. Heloka sy fahadisoana goavana eo anatrehan’ny firenena, ny taranaka sy ny tantara ny mbola hamelana hatrany ny fanohizan’ny mpitondra ankehitriny ny fitantanana gaboraraka, fampiasan-kery, fisamborana, fampitahorana, famaizana ao anatin’ny fandikana sy fanitsakitsahana ny Lalàmpanorenana nataon’ny fitondrana Rajaonarimampianina hatramin’ny taona 2014, hoy ireto farany. Soso-kevitra haroson’ny Antso ho Fanavotam-Pirenena ho an’ny filohan’ny Repoblika moa ny famindrana fahefana amin’ny filohan’ny Antenimierandoholona ao anatin’ny 30 andro izay fanapahan-kevitra tsy mivaona amin’ny Lalàna fototra izany. Vahaolana ala nenina mendrika horaisina manoloana ny lalan-tsarotra diavin’i Madagasikara hisorohana ny korontana eto amin’ny firenena, araka ny fomba fijerin’ny AFP. Mitombo isa hatrany noho izany ireo vondron’olona sy fikambanana mitaky ny fametraham-pialan’ny filoha Hery Rajaonarimampianina noho ny fahatsapana fa efa tena tsy zakany intsony ny fitantanana ny firenena. 

Ramano F.

Tia Tanindrazana

Samia mijoro ho an'i Gasikara.