Politique

Partagé sur :
• facebook

Hiditra amin’ny votoatiny ny fandinihana ilay tondrozotra manomboka eto. Ny amin’ilay fanitsiana hatao amin’izy io no hifantohan’ny dinika sy izay mety ho adihevitra.

 Nisy ny resaka savaranonando natao teny amin’ny hotely “Le Paon d’Or” Ivato omaly hariva, niantsoan’ireo fonksioneran’ny Troïka tonga eto ireo vondrona 11 nasain’ny SADC nidinika tany Gaborone tamin’ny jona 2011 teo. Fantapantatra tamin’ity fihaonana omaly ity fa mifantoka amin’ilay andininy faha-20 ao anatin’ilay tondrozotra vita rangopohy ihany aloha hatreto ilay fanitsiana. Na izany aza anefa dia nijanona ho ala sarona ny omaly fa tsy nisy fanapahan-kevitra noraisina. Ny mazava kosa dia ny fodian’ireo sesitany politika rehetra an-tanidrazana tsy misy fepetra, anisan’izany ny filoha Marc Ravalomanana, araka ny tapak’ireo filoham-pirenena eo anvon’ny SADC tao Sandton ny 12 jona 2011. Any amin’ny fanatanterahana azy io no mety hiadian-kevitra. Fepetra hisian’ny fitoniana no resaka eto, sy ny hoe iza no hanatanteraka izany ? Ny governemanta FAT am-perinasa sa ny governemanta vaovao iraisana ? Ny fahatongavan’ireo minisitra avy amin’ny Troïka anio no mety hidirana lalindalina kokoa amin’io.

Mbola hifamotoana eny Ivato rahateo ireo vondrona 11 ireo anio amin’ny 11 antoandro. Na inona na inona anefa zavatra voarafitra mandritra ny fihaonana manomboka eo, dia mijanona ho volavola izany satria dia tsy maintsy mbola hanao tatitra amin’ny Troïka, indrindra ny filohany, dia ny filoha afrikanina tatsimo, Jacob Zuma, izay naniraka azy ireto minisitra ho avy anio ireto. Solontena ihany koa ireo Malagasy mandray anjara amin’ny fikaonan-doha fa tsy maintsy ireo filohan’ny Ankolafy sy vondrona politika tsirairay avy no manaiky izay tondrozotra farany voarafitra eo vao hirosoana ny sonia, izay izy ireo rahateo no hanao izany, ary eto an-toerana, mazava loatra. Mbola sarotsarotra anefa ny hahatongavana amin’izany eo anatrehan’ireo fanambarana nisesy tato anatin’ny 48ora farany.

Ny V8 dia nanizingizina omaly fa ny tondrozotra nitondran’ny Dr Salomao fanitsiana tamin’ny 17 jona 2011 no fantany sy hosoniaviny. Tao amin’ny Magro Behoririka anefa dia Santdon milaza ny fiverenan’ireo sesitany politika tsy misy fepetra no fantany. Olana ihany koa ny fipoiran’ireo vondrona izay sady tsy nandray anjara tamin’ny rangopohy no tsy voasolotena tany Gaborone nefa tonga teny Ivato omaly, toy ny GMMR, tarihin’i Yves Aimé Rakotoarison sy ny GREMA tarihin’i Saraha Georget Rabeharisoa. Mbola olana koa ny amin’ireo nanao rangopohy nefa nipatitaka nony taty aoriana toy ny HPM. Iza no misolotena azy ? Ndremanjary Jean André sa Ralison Roger …

Jean D.

Tia Tanindrazana

Samia mijoro ho an'i Gasikara.