Politique

Fanendrena governoram-paritra Nangataka ny hevitry ny HCC i Rivo Rakotovao

Politique
Alarobia 13 Novambra 2019

Mbola mipetraka adihevitra taorian’ny fanendrena ny governoram-paritra ny fanapahan-kevitra noraisin’ny filohan’ny repoblika

nametrahana ny governoram-paritra miisa 11 tamin’ny 25 septambra lasa teo nandritra ny filankevitry ny minisitra. Na ny filohan’ny Fitsarana avo momba ny lalàmpanorenana (HCC), Jean Eric Rakotoarisoa, aza tsy sahy naneho ny heviny mahakasika iny fanapahan-kevitra iny raha manaraka ny voalazan’ny lalàmpanorenana tokoa na tsia fa nilaza manana ny atao hoe « droit de réserve » izy ireo ka tsy afaka manome ny valiny. Araka izany, nangataka izay hevitry ny HCC raha toa ka araka ny lalàna ny fanendrena governora, ny filohan’ny Antenimierandoholona, Rivo Rakotovao, izay zony amin’ny maha filohana andrimpanjakana azy. Hangataka ity filoha ity raha toa ka araka ny lalàna no namoahana ny didim-panjakana manendry ireo governora miisa 11. Andrasana ihany koa aloha ireo governora 12 ambiny. Fangatahana fanazavana faharoa teo amin’ny HCC ity nataon’i Rivo Rakotovao ity satria efa nangataka tamin’ny saika nanesorana ny loholona Randriambololona Mananjary izay saika nesorina tamin’ny maha loholona sy filoha lefitry ny Antenimierandoholona azy saingy nolavin’ny HCC tamin’ny didm-pitsarana navoakany tamin’ny 6 novambra lasa teo.

Marigny A.