Politique

Fananganana Parlemanta Hamory mpanao politika eny Iavoloha Rajoelina anio

Politique
Zoma 25 Novambra 2011

Raha mbola adihevitra tsy manam-piafarana ny nananganana governamanta, ambara fa fampiraisam-pirenena tarihin’ny praiminisitra Omer Beriziky, dia roso amin’ny dingana manaraka amin’ny fampiharana ny tondrozotra ny filohan’ny tetezamita Andry Rajoelina, dia ny fananganana Parlemanta. Hamory mpanao politika, indrindra ireo nanao sonia ny tondrozotra, eny amin’ny Lapam-panjakana Iavoloha i Andry Rajoelina amin’ity anio ity. Raha ny voalazan’ny drafitra fampiharana ny tondrozotra dia vitaina mialoha ny faran’ity volana novambra 2011 ity ny fampijoroana ny Parlemantan’ny tetezamita.

Tsy mbola mitovy anefa ny hevitry ny mpanao politika ny amin’ny hoe fanitarana tokony hatao, araka ny voalazan’ny tondrozotra. Fandrafetana vaovao sa fampitomboana isa ireo efa am-perinasa no hatao, na amin’ny Kongresy, na ho an’ny Filankevitra ambonin’ny tetezamita na ny Vaomiera mahaleotena misahana ny fifidianana ? Andrasana ny ho endriky ny fandraisana anjaran’ny Arema amin’izao efa maha eto an-toerana ny amiraly Ratsiraka, izay filoha mpanorina ity antoko ity izao.

Jean D.