Politique

Partagé sur :
• facebook

Omaly alakamisy 23 febroary no nanomboka tamin’ny fomba ofisialy ny asany ny biraom-pifandraisan’ny SADC eto Madagasikara izay tarihan’Atoa Tanki Natae, ka eny amin’ny trano be Assist Ivandry no misy ny foibeny.

 Teny amin’ny ministeran’ny raharaham-bahiny Anosy moa no nanaterany ny taratasy ofisialy manendry azy amin’izany andraikitra izany. Nandrira io fotoana omaly io ihany koa no nanambaran’ity solontenan’ny SADC eto amintsika ity, fa tsy hoe fe-potoana hentitra tsy maintsy hajaina tsy akory ilay 29 febroary, nambara tany am-boalohany fa tsy maintsy hahavitan’ny fampiharana ny famotsoran-keloka. Notsipihany mazava fa ny fampiharana an-tsakany sy an-davany ny tondrozotra no tena zava-dehibe, ary dia manentana ireo rehetra nanasonia ny tondrozotra mba hanao izay hanatanterahana azy amin’ny ambongadiny moa ity solontenan’ny SADC eto amintsika ity.

Mazava izany ny resaka eto fa dia nihemotra tamin’ny fanambarany ny amin’ny tsy maintsy hanajana ny datin’ny 29 febroary 2012 mba hampiharana ny famotsoran-keloka ny SADC ary mbola manome fe-potoana tsy voafetra ny fitondrana tetezamita handinihana sy hiadian-kevitra ary handaniana io volavolan-dalàna io. Mifandraika amin’ny fanirian’ny vondron’olona maro, mba hanokanana fotoana bebe kokoa handinihana tsara ny volavolan-dalàna momba ny famotsoran-keloka moa izany rehetra izany, koa dia manantena ny maro fa zavatra matotra no hofidiana eny amin’ny parlemanta, ary tena ho fanombohana ny fampihavanam-pirenena tokoa io famotsoran-keloka io fa tsy sanatria hampisavoritaka indray !

RTT

Tia Tanindrazana

Samia mijoro ho an'i Gasikara.