Politique

Fahaiza-mitantana Miaiky an’i Penjy Randrianarisoa ny praiminisitra

Politique
Zoma 06 Oktobra 2017

Modely amin’ny fampandrosoana ny kaominina Ivato. Misongadina ny fahavitan’ireo fotodrafitrasa vaovao maro ao amin’ity kaominina, vavahadin’i Madagasikara, ity toy ny lalana, tranompokonolona, tobim-pahasalamana, sekoly, tao anatin’ny roa taona nandrasain’ny Ben’ny tanàna Penjy Randrianarisoa an-tanana ny fitantanana ny Kaominina... Ho avy koa ny tsena. Manginy fotsiny ny fanohanana ara-tsosialy ireo mpianatra, tanora, mpanao fanatanjahantena, ny mpanakanto. Volan’ny vahoaka, avy amin’ny alalan’ny hetra aloany no nanatanterahana ny asa. Mavitrika amin’ny fandoavan-ketra ny vahoaka eny an-toerana noho ny fahatsapan’izy ireo ny tamberinandraikitra mivaingana ataon’ny mpitarika dia ny Ben’ny tanànan’izy ireo. Miaiky io fahaiza-mitantan’ny Ben’ny tanàna Penjy Randrianarisoa io ny praiminisitra Solonandrasana Mahafaly Olivier. Nambarany io nandritra ny Atrika momba ny famatsiam-bola eny ifotony, tanterahina hatry ny omaly etsy amin’ny Carlton Anosy.

Jean D.