Politique

Partagé sur :
• facebook

Naneho ny heviny mikasika ny herintaonan’ny tondrozotra ny 16 septambra 2011 – 16 septambra 2012 ny Dr Rakotomalala Harry anisan’ny mpanaraka ny toe-draharaha sy vaovao politika.

 Aminy dia “tsara iny tondrozotra iny raha nampiharina araka ny voalaza sy ny voarakitra ao anatiny. Tsy nanaotao foana ny nandrafitra azy iny fa efa nandinika lalina matoa roa taona taorian’ny fanonganam-panjakana nitranga ny taona 2009 vao nahita iny nifanarahan’ny maro an’isa iny. Ny olana amin’ilay tondrozotra izao dia ny fanahiniana amin’ny fanaratsiana azy sy ny tsy fanarahana ny voarakitra ao anatiny amin’ny antsakany sy andavany. Misy mantsy mahita tombontsoa amin’ny fitohizan’ny krizy amin’ny fanangonan-karena eto, ka faly izy ireo raha mitarazoka ny olana nefa ny Malagasy efa mihinana ny tsy fihinany sy miaina ao anaty tsy filaminana ary mitaintain-dava toa sahobakaka ambodiriana isan’andro”.

Nanome soso-kevitra kosa anefa ny Dr Rakotomalala Harry mikasika ny olana iniana tsy vahana eto amintsika io, ka nilazany fa “raha manohy ny fitiavan-tenany ny mpanao politika, indrindra ireo mahita tombontsoa ao anatin’ny krizy, dia anjarantsika vahoaka no mampiseho ny fiarovantsika ny fananantsika sy ny firenentsika ary ny harentsika. Tsy ireo mpanao politika tsy tia tanindrazana ireo akory no hanapotika ny tanindrazantsika eto amin’ny firaisana tendro amin’ireo tambajotra na mpanagalatra miaraka aminy ireo. Tsy valifaty akory no atao, fa ny fiverenana amin’Andriamanitra, ny fahatsapan-tena, ary ny fampisehoana fa isika vahoaka no tompon’ny fahefana fa tsy ireo olom-bitsy ireo”.

Tia Tanindrazana

Samia mijoro ho an'i Gasikara.