Politique

Partagé sur :
• facebook

Tsy takona afenina intsony izao fa efa misy kandida telo aman’efatra mihazakazaka mafy manao fampahafantarana ny tenany, eny fa na dia tsy mbola ofisialy aza fa nekena ny filatsahan-kofidiany.

 Ao ny mitety faritra, eo ny mitsidika toerana sy Fokontany maro samihafa, ao ny mitokana zava-bita, ao ny mitarika fivoriana etsy sy eroa, misy koa ny manatanteraka fifaninanana ara-panatanjahantena. Efa azo tarafina sahady dieny izao ety am-piandohana izao ireo kandida matanjaka ara-bola ka hanao izay azony atao rehetra mandritra ny propagandy. Samy manana ny fomba fiadiny rehefa samy eny an-tanim-boanjo, ka tsy hidirana lalina ny amin’iny. Fa ny mahalasa ny fisainana dia ity haino aman-jerim-panjakana toa mampisongadina olona sahady ity. Tsy mety vita hatramin’izao ny adihevitra momba ny nanindraindran’ny TVM an’i Camille Vital sy Hajo Andrianainarivelo, ka nandefasana tao anatin’ny filazam-baovao tamin’ny antsipirihany ny fitsidiham-paritra sy ny zavatra nataon’izy ireo. Moa va tena resy lahatra ireo tompon’andraikitra ao amin’ny TVM fa mety ireny fomba fikirakirana vaovao ireny ? I Camille Vital sy Hajo Andrianainarivelo dia fantatra tsara fa tompon’andraiki-panjakana ambony.

Ny iray masoivohon’i Madagasikara any Genève (Soisa), ny iray praiminisitra lefitra. Noraisin’ny olona ho fampiasana ny fahefana eo am-pelatanan’izy ireo mba hanaovana propagandy mialoha ny fotoana sahady ireny hita tao amin’ny TVM ireny. Mahazo tombony izany ny manampahefana, fa mba ahoana kosa ny amin’ireo kandida hafa ? Mafy hatoka hatreto aloha ny ao amin’ny ministeran’ny serasera ka tsy mety manokatra ireo haino aman-jery nakatona nandritra ny krizy, ary mbola hita ho tena malaina hamela hiasa malalaka ireo haino aman-jery voatery nikatona noho ny fandrobana sy ny fanimbana. Tokony ho efa mba hita ety am-boalohany anefa ny fifandanjan-kery eo amin’ny an-daniny sy ny an-kilany fa tsy misy tokony hahazo tombon-dahiny mihoapampana izany. Tsy misy ny lalàna mazava mandrara ny fihetsiketsehan’ireo kandida mialoha ny fampielezan-kevitra, fa mba tsy mety kosa raha mirona amina kandida izatsy na izaroa ny haino aman-jerim-panjakana, kanefa ilay fanjakana tsy manaiky ny hanokafana ireo haino aman-jery tsy miankina. Na samy mba alefa, na samy sy misy alefa aloha. Raha tahaka ireny foana aloha ny fomba fiasa dia mety ho raharaha ihany no hiafarany e !

RTT

Tia Tanindrazana

Samia mijoro ho an'i Gasikara.