Politique

Partagé sur :
• facebook

Tsy mamparisika ny olom-pirenena manana zo hifidy loatra ny fanamarinana na ao anaty lisi-pifidianana 4 na tsia satria maro no mihevitra fa na iza na iza lany eo dia tsy voahaja ny safidiny.

 Olana foana aloha no hita dia ny lisi-pifidianana, kara-pifidianana, voka-pifidianana, bileta tokana, birao fandatsaham-bato izay tsy fantatra mazava ny mason-tsivana namoronana azy ireo. Mila harenina ny lesoka tamin`iny fifidianana farany teo iny. Tsy mahatoky ireo rafitra misahana ny fifidianana ny olona amin’ny fifidianana manaraka. Mampieritreritra mihitsy ny vaomieram-pirenena misahana ny fifidianana (CENI). Novaina sahady ny lalàna mikasika ny fifidianana solombavambahoaka izay vao lany tamin`ny volana aprily 2018 lasa teo. Fa izy ity ve kilalaon-jaza e ? Tsy ny fomba fiasa no hasian-teny fa ny olona mandrafitra ity rafitra ity mihitsy. Ny depiote Felix Randriamandimbisoa aza dia efa nanao antso avo amin`ny tokony hanavaozana ireo olona mandrafitra ny CENI. Raha tiana hangarahara ny fifidianana, hoy izy, dia ovaina ny mpikambana ao amin`io rafitra io. Nahoana moa i Hery Rakotomanana no miverina filoha nefa efa tao anatin`ny CENI-T ? Tsy mahatoky ny Fitsarana Avo momba ny Lalàmpanorenana eo amin’ny famoahana ny voka-pifidianana ihany koa ny olona satria ny didy rehetra navoakany momba ny fandikan-dalàna nataon’ny mpitondra dia tsy misy mitaratra ny fahamarinana fa niandany hatrany.  Tsaroana tsara ny fanambaran`ny filohan`ny HCC, Jean Eric Rakotoarisoa, amin`ny fanaratsiana rafitra mandritra ny fifidianana. Tsy rafitra no resaka fa ny olona mandrafitra an`ireo rafi-panjakana. Lasa fitaovan`ny olom-bitsy ny CENI sy ny HCC amin`izao ary hitam-poko sy hitam-pirenena. Ahiana hihena ny taham-pahavitrihana noho ny tsy fahatokisan’ny vahoaka mpifidy ireo rafitra ireo. Ny azo antoka dia tsy hisy hahatoky voka-pifidianana amin`ny fifidianana manaraka raha tsy mifona ampahibemaso izy ireo, miaiky ny tsy mety ary manome toky fa hanova famindra.

Marigny A.

Tia Tanindrazana

Samia mijoro ho an'i Gasikara.