Politique

Partagé sur :
• facebook

Misy ary mijoro tanteraka ny Antoko MFM. Nanamafy izany ny tao Antsirabe ka nitafa tamin’ny mpanao gazety ho fanamarihana ny faha-44 taona nijoroany ny alarobia 27 desambra teo.

Nambaran’ny filohan’ny Antoko ao Vakinankaratra, Atoa Mbahiny fa antoko mitolona ho amin’ny fandrosoan’i Madagasikara ny MFM ary mandala ny firehan-kevitra “Liberaly Demokraty”, ary mpikambana ao amin’ny vondrona Liberaly Iraisam-pirenena mihitsy, ka mandala ny fanaovana fifidianana ahazoana fahefana. Nambaran’ny mpitarika fa tokony hitana ny andraikiny ny rehetra ka ny fanjakana mandamina ny fandraisan’anjaran’ny mpisehatra, ny fiarahamonim-pirenena manara-maso ny olona nampindramina fahefana ary ny antoko politika dia tokony hitaiza sy hanabe ny olona amin’ny raharaham-pirenena. Raha ny tao Antsirabe moa dia nandray anjara hatrany ny antoko teo amin’ny raharaham-pirenena satria nanohana ny kandidà Jean Louis Robinson izy ireo tamin’ny fifidianana filoham-pirenena taona 2013, nanana kandidà solombavambahoaka ary niaraka tamin’ny fikambanana “Iray ihany isika” tamin’ny fifidianana Ben’ny tanàna natao ny 31 jolay 2015. Mampirisika ny fampiasam-bola miteraka asa ao Antsirabe ny antoko satria raha i Vakinankaratra dia mahatratra 1.800 isan-taona ny tanora afaka bakalorea ary ny 1.300 amin’ireo dia miditra amin’ny sehatry ny asa avy hatrany fa tsy manohy ambaratonga ambony intsony.

Caius R.

Tia Tanindrazana

Samia mijoro ho an'i Gasikara.