Politique

2018-Handrotsaka olona ny Marina Tsangan-kevitra vao tsangan’olona…

Politique
Alakamisy 07 Septambra 2017

Nanamafy ny antoko Marina tarihin-dRanaivoson Desiré fa manana kandida harotsaka ho filoham-pirenena izy ireo amin’ny 2018.

Tsy mbola nampahafantarina kosa anefa ny anarany. Ny fandaharan’asany aloha no kirakiraina amin’izao fotoana. Aoka izay ity resaka olona ity fa ny foto-kevitra aloha no ndao resahina, ny programa sy ny fomba fiasa hanatanterahana azy, hoy Ranaivoson Desiré. Rehefa mipetraka izay dia fantatra ny afaka hitondra ny firenena. Ny olona no tokony hipetraka eo ambonina programa, fa ny eto amintsika dia ny olona no mandeha mialoha kanefa tsy fantatra ny tetikasa sy zavatra hataony, ka ny hiafarany dia diso fanantenana foana isika, hoy izy. Andeha hifanarahana ny zavatra hatao amin’izay na ny olom-pirenena aza mba mahatsiaro ny andraikiny amin’ny zavatra hataony. Manamafy kosa ny antoko Marina fa misy zavatra mifandipatra eo amin’ny lalàmpanorenana sy lalàm-pifidianana. Ny CENI izao dia ny lalàmpanorenana no hiaingana, kanefa ny lalàm-pifidianana dia milaza fa tsy tokony hatao ao anaty fahavaratra ny fifidianana satria miteraka tsy fitovian’ny herijika eo amin’ny mpifaninana, saingy mitontona amin’izany ny 2018. Manolo-kevitra sy nanolotra daty izy ireo, ka ny 6 mey ny fihodinana voalohany amin’ny fifidianana filoham-pirenena ary ny 1 jolay ny fihodinana faharoa.

Toky R.