Finoana

Sekoly FJKM Hankalaza ny faha-200 nisiany

Finoana
Zoma 07 Desambra 2018

Mitohy ny taom-pankalazana ho an’ny Fiangonan’i Jesoa Krsisty eto Madagasikara.

Taorian’ny jobily faha-50 taonan’ny FJKM sy faha-200 taona nidiran’ny Filazantsara nentin’ny LMS (London Missionary Society) teto Madagasikara nankalazana tamin’ity taona 2018 ity, dia hitohy amin’ny fankalazana ny faha-200 taonan’ny sekoly FJKM indray izany amin’ny taona ho avy 2019. Ny 8 septambra 1818 no niandohan’ny tantaran’ny sekoly protestanta, naorin-dry David Jones, teto Madagasikara. Tetsy Andohaho, Razafindrahety, ampitan’ny katedraly Katolika no nisy azy tamin’izany. Noho ny fandaminana dia nahemotra ho amin’ny 2019 ny fankalazana ny Jobily faha-200 taonan’ny fanabeazana FJKM. Mijoro ankehitriny ny Komitin’ny Jobily, tarihin’ny filohan’ny FJKM teo aloha, Pastera Rasendrahasina Lala Haja. Hatolotra mandritra ny fotoam-bavaka hatao ao amin’ny FJKM Andrainarivo ny tolakandron’ny alahady 9 desambra ho avy izao ireo tompon’andraikitra amin’izany. Hatao any Tsiroanomandidy amin’y 27-28 martsa 2019 ny fanokafana ny fankalazana ity Jobily faha-200 taonan’ny Sekoly FJKM ity. I Fianarantsoa no hampiantrano ny ivon’ny fankalazana amin’ny septrambra 2019 ary any amin’ny volana novambra 2019 ny famaranana hatao eto Antananarivo.

Jean D.