Finoana

Partagé sur :
• facebook

Vahaolan’ny tsy te hisahirana no noraisin’ny Fanjakana dia ny fanakatonana ny Fiangonana, mandra-pisy fandaminana ny raharahan’ny Fiangonana FLM Ampandrozonana ao Sambava

. Tamin’ny alakamisy no nilatsaka ny didy avy amin’ny Prefen’i SAVA hanakatonana ity fiangonana ity ary tsy azo nampiasaina hatramin’ny tokotany. Vokatr’io fandrarana io dia tsy azon’ny mpino loterana nidirana ny fiangonana omaly alahady, hany ka nizara roa ny mpiangona. Ny ampahany nanangana “hangar” teny amin’ny 60m miala ny fiangonana ary tao no nivavaka omaly. Ny ampahany hafa indray nindrana trano tany amin’ny Cercle Franco-Malagasy.

Malahelo ny mpino loterana manoloana izao toe-javatra izao, fa lasa itsabahan’ny fanjakana ny raharahan’ny Fiangonana, izay mifanohitra amin’ny voalazan’ny lalàmpanorenana. Misy loharanom-baovao milaza fa niainga teny Mahazoarivo teny ny tsindry, nitarika tamin’ny fandraisana io fepetra fanakatonana Fiangonana io. Tsiahivina fa Pastora mandà ny famindran-toerana nataon’ny synaodam-paritany no niandohan’ity raharaha FLM Ampandrozonana ity, efa ho iray volana izao. Araka ny fantatra dia ho anisan’ny lahadinika amin’ny KMSL (Komity Mpiandraikitra ny Synaoda Loterana) hatao any Toliara ny 6 sy 7 novambra 2015 io raharahan’ny FLM Sambava io. Etsy an-kilan’izay anefa milaza ny hitondra ny raharaha eny amin’ny Fitsarana ny komitim-piangonana.

Jean D.

Tsy azon’ny mpino Loterana idirana ity fiangonana ity nanomboka ny alakamisy 15 oktobra 2015

Tia Tanindrazana

Samia mijoro ho an'i Gasikara.