Finoana

Raharaha METM Manambana hitory ny foibe ny fokonolona

Finoana
Alakamisy 17 Mey 2018

Taorian’ny fanakatonan’ny avy eo anivon’ny prefektiora ny fiangonana METM Zoara Antohomadinika ny 11 martsa teo ka nitorian’ny foiben’ny fiangonana METM ny pasitera ao an-toerana,

Alain De Neri Andrianantenaina noho ny resaka fanodinkodinam-bolan’ny sekoly eo ambany fiadidian’ity fiangonana ity sy resaka fandratrana olona dia tsy nilefitra nanoloana ireo fanapahan-kevitra ireo ny fokonolona eny an-toerana. Nanamafy moa omaly ny solontenan’ireo fokonolona miisa 600 izay nanao sonia ny tsy fanekena ny fanakatonana ny fiangonana sy ny fanalana ny mpitandrina ao an-toerana fa dia miandrandra ilay rafitra ivondronan’ny komity maromaro ao anaty METM na ny Soba komity mba handinika tsara ny raharaha sy hamoaka didy ara-drariny mba tsy hampiakaran’izy ireo izany any amin’ny fitsarana. Nohamafisin’izy ireo fa na ny prefe aza efa nampiantso ireo ankolafin-kery rehetra hifampiraharaha ny 24 aprily teo saingy ny foibe irery no tsy tonga. Efa eo an-tanan’ny fiangonana ihany koa ny tatitry ny mpanadihady ny resaka fitantanam-bola (Expert comptable) nahazo fankatoavana avy amin’ny prefektiora hanamarinana izay tena nanodinkodina marina. Ny zoma izao moa dia hamaky bantsilana izany ireo tompon’andraikitra mandra-piandry ny valim-pitsarana amin’ny 28 mey izao.

J. Mirija