Mpikabary Katolika

Niampy 561 isa ny eto Antananarivo

Finoana
Alatsinainy 18 Septambra 2023

Navoaka tamin’ny fomba ofisialy tetsy amin’ny Kianja Maki Andohatapenaka ny sabotsy teo ny andiany faha 18

amin’ireo mpikabary mikambana eo anivon’ny Fikambanan’ny mpikabary Katolika eto Madagasikara na Mpikalo. Nampitondraina ny anarana hoe andiany Masindahy Paoly moa izy ireo, hoy ny fanazavana. 561 isa izy ireo. 9 volana ny faharetan’ny fiofanana ka miisa 3 ireo taranja iofanana ao anatin’izany, izany hoe kabary fototra ny 3 volana voalohany. 2 volana, kabary an-karatsiana. 4 volana farany ny kabary am-panambadiana sy am-pifaliana mbamin’ny famoahana fety entina amin’ny vanim-potoana tahaka izao. 750 ireo niofana tany am-piandohana saingy noho ny antony maro samihafa dia ireo no naharitra. Ny tarigetra sy fiainan’i Md Paoly izany, araka io anarany io, no arahan’ireto andiany vaovao ireto. Maharitra 5 taona ny fiofanana aorian’ny famoahana voalohany tahaka izao. Tsy ifanerena intsony anefa izay fa miankina amin’ny safidy sy tanjon’ny mpiofana tsirairay. Amin’ny oktobra ny fidirana manaraka. Eny anivon’ny fiangonana Katolika rehetra ny fanentanana sy vaovaom-piangonana, hoy hatrany ny fanazavana. Niampy 561 isa indray izany ireo mpikabary Katolika eto amin’ny diosezin’Antananarivo.
J. Mirija