Finoana

Partagé sur :
• facebook

Nitondra fanamarihana mikasika ireo vaovao nivoaka an-gazety sy tamin’ny haino aman-jery momba ny mety hiverenan’ny FFKM amin’ny fanelanelanana eo amin’ireo ankolafy politika maro samihafa ny mompera Rakotondrasoa Jean Timothé avy amin’ny FFKM sampana Antananarivo ka nilaza fa tsy marina sy tsy mitombina velively izany.

Siosion-dresaka tsy mbola voaporofo no navoaka araka ny filazany. Ireo filoham-piangonana efatra mirahalahy ihany no afaka milaza izay zavatra hataon’ny FFKM, fa raha toa ka tsy niteny izy ireo dia honohono fotsiny izany no naparitaka tetsy sy teroa, araka ny filazany ihany. Hatreto aloha, tsy nisy ny fanambarana ofisialy nataon’ireo filoham-piangonana ny amin’ny mety hiverenan’ny FFKM hanelanelana, nisy kosa anefa ny antso navoakan’ny Fiombonan’ny Fiangonana Kristianina eto Madagasikara mba handraisan’ny rehetra ny andraikitra tandrify azy amin’ny famahana ny krizy. Taorian’ny fivoriana faha-33 nataon’ny Komity foibe FFKM notanterahana farany teo tany Toliara no nivoahan’ny fanambarana. Midika ve izany rehetra izany fa tsy hanelanelana intsony ny FFKM ? Maro koa no mieritreritra fa taorian’ireny savorovoro tamin’ny 2009 ireny dia mety nanapa-kevitra ny hipetraka amin’ny maha raiamandreny am-panahy azy ny FFKM ary tsy hiditra mivantana intsony amin’ny raharaha politika satria nahasarotra ny zava-nitranga rehetra teto amin’ny firenena ny fidiran’ny fiangonana tamin’ny raharaham-panjakana sy ny tontolo politika, ary maro no tsy faly amin’ny hanaovana ho fitaovana politika ny fivavahana. 

Tia Tanindrazana

Samia mijoro ho an'i Gasikara.