Finoana

Partagé sur :
• facebook

«Raha izao no mitohy dia mizotra mankany amin’ny fahapotehana sy faharavana ny fiainam-pirenena. Miha milentika hatrany ao anatin’ny fahantrana sy ny tsy fandriampahalemana ny vahoaka Malagasy. Efa latsaka ambany tokoa izany fahavoazana izany ka mihatra aman’aina ny zava-miseho. Tsy vitsy ireo latsaka anaty famoizam-po noho ny zava-misy mianjady. Miseho lany etsy sy eroa koa ny tsy fitovian-kevitra misy eo amin’ny samy mpanao politika. Mbola variana mihevitra ny tombontsoany fotsiny ihany ny maro ary samy te hanamarin-tena, ka hadino tanteraka ny vahoaka mijaly. Efa be loatra ny voka-dratsy naterak’izany nandritra ny herintaona mahery izao (aina nafoy, fananana rava sy potika, vahoaka mijaly sy very asa...)”, hoy ny filohan’ny Eglizy Episkopaly Malagasy (EEM), ny Mgr Ranarivelo Samoela Jaona. Manoloana ireo dia miantso ny zanany ny fiangonana mba samy handini-tena ary koa hieritreritra tsara manoloana ny fanapahan-kevitra rehetra raisina. Ampy izay, hoy izy, ny fifanomezan-tsiny sy ny fifanilihana andraikitra. Mila fitoniana ny vahoaka, hoy ihany ny filohan’ny EEM koa aoka hatsahatra ny fampihorohoroana sy ny fihantsiana. Amin’ny maha-mpaminany ny Fiangonana, araka ny fanambarana ihany dia manaitra ny feon’ny fieritreretan’ny tsirairay ho sahy hifanatona, hiara-hikatsaka izay ho vahaolana ho tombontsoam-bahoaka hiadanan’ny Malagasy. Mitaky fahavononana hibebaka izany rehetra izany, eo koa ny finiavana sy fanetren-tena. 

Tia Tanindrazana

Samia mijoro ho an'i Gasikara.