Finoana

Marc Ravalomanana mivady Niarahaba ny Kardinaly sy ny Eglizy Katolika

Finoana
Alakamisy 12 Jolay 2018

Nanatrika ny fandraisana ny Kardinaly Désiré Tsarahazana teny amin’ny Villa Roma Ivandry, toeram-ponenan’ny solontenan’ny Papa Ray Masina eto Madagasikara Atoa Marc Ravalomanana sy Ramatoa vadiny omaly.

Niatrika ihany koa ny lamesa lehibe voalohany notarihin’ity laharahana voalohany amin’ny Finoana Katolika eto Madagasikara ity teny amin’ny Ekar Saint François Xavier Antanimena omaly hariva. Tsy adinony ny niarahaba ny Eglizy Katolika eto Madagasikara sy ny Kristianina Katolika rehetra nahazo Kardinaly vaovao. Niarahaba ny Kardinaly Désiré Tsarahazana, ary nirary soa azy, hahaleo hahalasana amin'ny adidy masina nankinina aminy. Zava-dehibe ho an'i Madagasikara ny nahazo Kardinaly indray rehefa niandry izany nandritra ny valo taona taorian’ny fodiamandrin’ny Kardinaly Armand Gaetan Razafindratandra ny 9 janoary 2010. Marihina fa tsy hipetraka eto Antananarivo ny kardinaly vaovao, fa hitoetra any Toamasina ary horaisina amin’ny fomba makotrokotroka any an-toerana.

Toky R