Finoana

Marc Ravalomanana Hampiombona ny mpino FJKM

Finoana
Alatsinainy 29 Aogositra 2016

Fotoan-dehibe ho an�ny mpino FJKM ny taona 2018 ary efa miomana amin�izany sahady ireo mpitantana vaovaon�ity Fiangonana ity, izay vao voafidy nandritra ny sinaoda lehibe faha-18 notanterahina tao Antsirabe ny herinandro lasa teo

. Feno 50 taona katroka amin’io taona io ny Fiangonan’i Jesoa Kristy eto Madagasikara. Tsy avelan’ny kristianina FJKM handalo fotsiny izany taon-jobily volamenan’ny Fiangonana izany fa homarihina manetriketrika ary hisy tsangambato ho marik’izany eny amin’ny sekoly teolôjika Ivato. Napetraka nandritra iny sinoda tao Antsirabe iny, ny komity hitantana ny fankalazana, ka ny filoha mpanampy laika teo aloha, Atoa Marc Ravalomanana no nosafidian’ny besinimaro ho filohan’ny komitin’ny jobily volamena faha-50 taonan’ny Fiangonana FJKM izay hankalazaina amin’io taona 2018 io sy ho fankalazana ihany koa ny faha-200 taona ny nidiran’ny Filazantsara teto Madagasikara. Fanirian’Atoa Marc Ravalomanana rahateo ny mbola hanohy ny asa fanompoana ny Fiangonana ka dia izy izao nanankinana andraikitra goavana izao. Marihina moa fa efa in-telo filoha lefitry ny fiangonana FJKM ny tenany ka tsy afaka nilatsaka intsony saingy mbola nomen’ny rehetra fitokisana amin’ny asa goavana izao indray, hampiombonana ny mpino FJKM.

Caïus R.