Finoana

Makotroka any Mahajanga Raikitra ny JMJ Mada 2018

Finoana
Alarobia 10 Oktobra 2018

Nosantarina tamin’ny lamesa lehibe tao amin’ny Village Touristique ao Mahajanga ny fanokafana tamin'ny fomba ofisialy ny Fihaonamben’ny tanora andiany faha-9 na ny JMJ MADA 9 any amin’ny tanànan’ny Voninkazo.

Mpizaika maro be avy amin'ny lafivalon'ny Nosy no manatrika izany any an-toerana amin’izao fotoana ary misy aza mbola eny an-dalana satria hatramin’ny 14 oktobra ny fihaonambe. Nisy ny olana kely teo anivon'ny fikarakarana satria tsy ny mpizaika rehetra no mbola nahazo ny "badge" ahafahana miatrika ity fankalazana ity. Azo lazaina fa nilamina amin'ny ankapobeny ity fanokafana ny JMJ faha-9 ity. Tanora avy amin’ny fiangonana katolika manodidina ny 100 000 no mandray anjara amin’ity fihaonambe fanaon’ny tanora katolika ity, izay eo ambany fiahian’ny Monsenera Désiré Tsarahazana, ary mazava ho azy fa hisy ihany koa ny iraka avy any Vatican hanome voninahitra izany. Misy tamin’ireo kandida filoham-pirenena moa no nanatrika sy nanome voninahitra ny fanokafana omaly, ka isan’izany i Marc Ravalomanana, izay efa hatry ny tamin’ny alatsinainy teo no nihazo an’i Mahajanga. Nifanakaiky toerana izy sy ny kandida Eliana Bezaza sy Mahafaly Solonandrasana Olivier. Sarahan’ny politika sy ny fifidianana izany ireo kandida fa akamban’ny fivavahana sy ny finoana. Makotroka tanteraka any Mahajanga amin’izao.

Toky R