Finoana

I Besalampy, tsiahivina ihany, no toerana nosafidian’i Baba hialana sasatra taorian’ny nandehanany nisotro ronono ny taona 2006. Nindaosin’ny fahafatesana teto Antananarivo izy ny 9 janoary 2010, ka tsy afaka nandalo tany Besalampy ny nofo mangatsiakany, ka ho fahatsiarovana azy indrindra no nanorenana ity tsangambato milanja 4 taonina ity eo an-tokotanin’ny trano naorina hitoerany tao an-toerana. I Baba dia raiamandreny nahavita be teo amin’ny asa fitoriana sy fampielezana ny vaovao mahafaly, sady nampiombona an’i Besalampy, na kristianina, na miziolimanina na ny tsy mpino. “Mba ho iray anie izy rehetra” rahateo no teny filamatra nentiny. Nitarika ny lamesa ny evekan’i Mahajanga, Mgr Rakotondrajao Solo Roger Victor.

Tonga nanotrona sy niara-niombom-bavaka tamin’ny vahoaka tany an-toerana Rtoa Lalao Ravalomanana, ity farany izay sambany aza no tonga tany an-toerana, dia hita ho nanganohano ny masony raha nandray fitenenana satria dia olona akaiky sy nifandray am-po tamin’ny fianakaviana Ravalomanana ny Kardinaly Razafindratandra Armand Gaétan. Nankahery ny vahoaka tany an-toerana sady nanolotra omby iray sy fotsimbary ho nofonkena mitam-pihavanana ny tenany noho io fotoan-dehibe io. Nanotrona ity fotoana ity koa ny praiminisitra lefitra misahana ny toekarena sy ny indostria Botozaza Pierrot, ny minisitry ny fambolena Ravatomanga Roland, ny minisitry ny varotra Ramalason Olga, ny lehiben’ny Faritra Boeny, Rasolofoniaina Christophe Jean Noel, ny mpikambana amin’ny kongresin’ny tetezamita Mohamady Sakra.

Jean D.