Finoana

JMJ andiany faha-9 any Mahajanga Nahemotra noho ny fifanitsahana amin’ny BEPC

Finoana
Alarobia 21 Febroary 2018

Hahemotra ny 8-14 oktobra ho avy izao ny Fihaonamben’ny tanora na ny JMJ Mada andiany faha-9 eo anivon’ny fiangonana katolika, any Mahajanga noho ny antony samihafa.

Io no fanambarana navoakan’ny Fivondronamben’ny eveka mitondra ny datin’ny 16 febroary teo. Anisan’ny antony lehibe indrindra amin’izany ny fifanitsahan’ny daty novinavinaina teo aloha amin’ny daty hanaovana ny fanadinam-panjakana BEPC, ary mifanakaiky amin’ny fanadinana hafa. Tsy voatazon’ny fanjakana tamin’ny fotoana voafaritra teo aloha ny fotoana hanaovana ny fanadinam-panjakana noho ny antony maro, toy ny fandalovan’ny pesta. Niezaka nandamina ny fandaharam-potoanany ny teo anivon’ny fiangonana katolika mba hitsinjovana ny zanaka Malagasy. Maro amin’ireo tanora katolika tokony hiatrika io fotoana io rahateo no handray anjara amin’ny fanadinam-panjakana. Tanora hatrany amin’ny 100 000 no handrasana ho avy any amin’ny tanànan’ny voninkazo amin’io fotoan-dehibe io. Tsara ny mampahatsiahy fa efa ny volana septambra no tonga any amin’ny diosezin’i Mahajanga ny lakroan’ny JMJ, izay nentina niala avy any amin’ny diosezin’i Fianarantsoa, izay nampiantrano ny JMJ farany.

Toky R