Finoana

Isan-taonan’ny Synodam-Paritany Fisakana Tontosa tao amin’ny FLM Andriankely

Finoana
Alarobia 05 Septambra 2018

Tontosa tao amin’ny fiangonana FLM Andriankely kaominina ambanivohitra Tsarazaza distrikan’i Fandriana, tamin’ny 31 aogositra-alahady 02 septambra 2018 teo, ny Isan-taona faha-26 an’ny Synodam-Paritany Fisakana.

Mpivory nanodidina ny 300 no tonga nanatrika tany ary saika tazana tao avokoa ireo Pastora miasa ao amin’ny SPaFi. Miroborobo ny fitaizana ara-panahy sy fampianarana kristianina ka mbola mahatazona ny fiarahamonina hirindra any amin’iny faritra iny saingy mila tosika sy fanampiana lehibe ireo fotodrafitrasan’ny fiangonana. Nandray anjara mavitrika ny fikambanana Orimbaton’i Madagasikara tarihan’ny filoha nasionaliny, Mahafaly Solonandrasana Olivier, ka nonolotra tafo mitentina 5 tapitrisa Ar ho an’ny FLM Andriankely. Ravo ny fiangonana nandray ny fanampiana ary nanambara fa tsy lavitra Andriana izy ireo fa misy mpijery ary heverina fa valim-bavaka izao fahazoana ny tolotra izao. Nanamafy izany teny fankasitrahana izany ny filohan’ny Synodam-Paritany Fikasana, ny Pastora Alfred Randriamandimbison. Rtoa Dina Rakotomalala, mpitarika ny Orimbaton’i Madagasikara distrikan’i Fandriana dia nilaza ny fisofakan’ny fiaraha-miasan’ny fikambanana amin’ny fiangonana kristianina satria raha te hanova ny bokin’i Madagasikara ho tsara rakitra dia mifanohana amin’ny fiangonana amin’ny asa fitaizam-panahy hananana olom-pirenena vanona no tokony ho vaindohan-draharaha

Ntsoavina Evariste