Finoana

Partagé sur :
• facebook

Tsy azo ihodivirana ny fampihavanam-pirenena, araka ny hevitry ny Hery Politika Mitambatra (HPM), elatra nisintaka tamin’ny Profesora Zafy Albert.

 Misy ny lonilony nateraky ny tsy fitovian-kevitra ara-politika izay mbola iainana hatramin’izao, hoy ny profesora Ralison Roger. “Atao ny fampihavanam-pirenena saingy tsy midika akory izany fa avela hanjaka ny tsimatimanota. Tsaraina izay voarohirohy ka asaina manonitra izay meloka avy eo, izany hoe ny fampihavanam-pirenena nataon’ny firenena Afrikanina Tatsimo no alaina tahaka”. Nohamafisiny koa anefa fa tsy tokony hianona amin’ny resaka politika ihany izany fa ilaina fifamelana ny disadisa ara-tsaranga, ara-piaviana ary ara-poko nanomboka tamin’ny vanimpotoan’ny faha Mpanjaka sy notohizan’ny mpanjanatany. Ho an’ny HPM dia ny Komity fampihavanam-pirenena no misahana io fampihavanana io ary atomboka dieny izao izany.

Tsy vita vetivety akory izany fa ilaina fotoana lava hamafana ny alahelo isan-karazany naterak’ireo toe-draharaha niainan’ny firenena ireo. Momba ny fihaonana any Gaborone indray dia nanambara ity mpandrindra nasionalin’ny HPM ity fa tokony ho teto Madagasikara no hanatontosana io fihaonana io. Azo atao tsara ny manatanteraka azy tany Nosy Be Hell-ville, ohatra, raha misy olana ny fahatongavan’ireo filoha roa lahy sesitany eto an-drenivohitra. Na izany aza dia miangavy ireo mpandray anjara amin’ilay fihaonana any Gaborone koa ny tenany mba hampandefitra ny hambom-po sy ny kajikajy politika ka hitondra vahaolana.

Yves

Tia Tanindrazana

Samia mijoro ho an'i Gasikara.