Finoana

Partagé sur :
• facebook

Nangina nandritra ny 8 taona ka indro nifoha tamin`ny torimasony ny HMF (Hetsiky ny Mpitondra Fivavahana) manoloana ny fijalian’ny vahoaka Malagasy Mpiray tanindrazana. Kihon-dalana lehibe ho azy ireo ny vanim-potoana ankehitriny satria maro ny endri-javatra efa manaporofo ny asan’ny « tsy marina » sy izay rehetra mpomba azy ankehitriny.

 
Miharihary ny tsy fahombiazan’ny mpitondra ary toa voatery mitoetra ao amin`ny tsy fahatoniana ny Malagasy ka tsy ahafahan`ny vahoaka mampiasa ny fahefana kanefa i Madagasikara dia tany demokratika. Araka ny nambaran`ny Mpitandrina Randriamisata Roger dia ``tsy afaka ny hangina intsony izahay fa hiteny ary hijoro mba hampijoro ny fahamarinana eto amin`ny tanindrazantsika. Hampianarinay ahafantatra sy hitaky ny zony voahitsakitsaka ny vahoaka ary hijoro ho mpitarika azy ireo izahay amin`ny fotoana rehetra ilany izany``.  Tena tsy tafandrimandry tanteraka intsony ny HMF, noho ny fahitana ny  lalana izoran’ny firenena mankany amin’ny  fahasimbana  sy ny fahapotehan’izay kely sisa mbola hananana. Amin’ny fotoana hisian’ny olana mantsy tsy fantatra izay afaka mamonjy. Izany no antony itorian’ny Hetsiky ny Mpitondra Fivavahana  ny fahamarinana mba hizotra amin’ny lalana mahitsy hatrany ny Malagasy ary hanankina ny fiainana amin’Andriamanitra. Teboka telo no navoitra nandritra ny valandresaka tamin`ny mpanao gazety omaly dia ny Malagasy no tompon`ny fahefana, i Madagasikara an`ny Malagasy ary fifidianana demokratika ho an`ny rehetra. Amin’ny fotoana hahatanterahan’izany mantsy dia ho rehareha ilay hoe « dia ho tany sambatra ilay Madagasikaranay ».

Marigny A.

Tia Tanindrazana

Samia mijoro ho an'i Gasikara.