Finoana

Hetsiky ny Mpitondra Fivavahana Miantso ny mpitondra hiala am-pilaminana

Finoana
Talata 24 Aprily 2018

Manoloana ny toe-draharaham- pirenena dia tsy afaka ny hangina izahay Mpitondra Fivavahana mivondrona ato amin’ny HMF (Hetsiky ny Mpitondra Fivavahana), hoy ny fanambaran’izy ireo omaly, izay nosoniavin’ny mpandrindra dia ny mpitandrina Randriamisata Roger sy ny mpitandrina Ramamonjisoa Philibert.

Hentitra izy ireo nilaza, fa tena heloka eo anatrehan’Andriamanitra sy ny Tanindrazana ny fandatsahana ny ran’ny mpiray Tanindrazana ka tokony hibabohana fa tsy ho tohizana sanatria. Ny fihavanana sy ny fifampiresahana dia tena ilain’ny firenenena ary tokony hatao maika izany mba hiverenan’ny filaminana sy ahazoana manangana rafitra iombonana hizorana mankany amin’ny fifidianana milamina handraisan’ny rehetra anjara, hoy hatrany ity fanambarana ity. Tsy nisorona ny HMF nilaza fa ny mpitondra fanjakana dia natao hiaro ny ain’ny vahoaka entina koa rehefa solofaka toy izao dia antsoina mba hanam-pahendrena hiala am-pilaminana. Hafatra miantefa amin’ny mpitandro ny filaminana ny hoe: “Aoka hisintaka tanteraka amin’ny politika ary tsy hamono ny vahoaka noho ny baiko politika”. Miantso ny mpiray tanindrazana rehetra hiray hina tanteraka. Hiombom-po amin’ireo manana ny maty sy maratra isika ary hivavaka mafy ho an’ny Firenena mba hanjakan’Andriamanitra, hialan’ny asan’ny maizina rehetra, hoy hatrany ity fanambarana ity.

Toky R