Finoana

Hafatry ny Papa ho an'ny tanora "Miditra eto Madagasikara amin'ny alalanareo ny hoavy"

Finoana
Alatsinainy 09 Septambra 2019

Tanora anankiroa no nijoro vavolombelona, nitantara tamin'ny Papa Fransoa sy ireo rehetra tonga nanatrika ny alim-bavaka teny Soamandrakizay,

ny lalam-piainana nodiavin'izy ireo sy ny faniriany avy. Niainga tamin'izay ny hafatra nampitain'ny Ray Masina tamin'ireo tanora malagasy, tamin'ny sabotsy teo. Amin'ny alalanareo, hoy izy, dia miditra eto Madagasikara sy ao amin'ny Eglizy ny hoavy. Mba hahatanteraka izany dia nanentana ny tanora mba hatoky tena ny Papa, satria ny Tompo no voalohany nametraka fitokisana aminareo, hoy ny nambarany. Nanasa ny tanora izy mba hatoky tena, hatoky ny fahafaha-manao sy ny fahaiza-manao. Tao anatin'izany koa anefa dia anisan'ny fanentanana nataon'ny Ray Masina tamin'ny tanora ny mba hiarahan'izy ireo miasa. Marina, hoy ny voalazany fa afaka mahazo zava-dehibe ny tsirairay nefa raha miaraka dia afaka manonofinofy sy manatanteraka zavatra tsy hita noanoa. Fangatahana moa no namaranan'ny Papa ny hafatra navelany ho an'ny tanora, dia ny hoe : "aza adino ny mivavaka ho ahy".

Marigny A.