Finoana

FLM Androhibe Hanangana fiangonana sy toeram-pitsaboana

Finoana
Alatsinainy 12 Oktobra 2015

20 taona mahery taty aorian�ny niforonany, dia hanangana trano fiangonana lehibe ho an�ny kristianina ny fiangonana Loterana Androhibe Finoana. Eo amin�ny toerana malalaka iray eo amin�ny fokontanin�Androhibe no hananganana azy rehefa nahazoana alalana tamin�ny fitondram-panjakana nifandimby teto Madagasikara.

Ankoatra ny trano fiangonana dia hatsangana eo amin’io toerana io ihany koa ny toeram-pitsaboana izay hotantanan’ny fiangonana Loterana sy toeram-piofanana arak’asa ho an’ny tanora izay maro tokoa no tsy an’asa amin’iny faritra iny. Misy mitsivalana anefa ankehitriny izany fikasan’ny Fitandreman’Androhibe Finoana izany. Nisy olon-kafa ihany koa nangataka io toerana io taty aorian’ny nandrenesany fa nametrahan’ny fiangonana fangatahana ny toerana tamin’izany andro izany saingy tsy nahazo rariny teo anivon’ny fanjakana noho io fangatahana io nitsinjo tombotsoan’olon-tokana, izay nangataka ny tany tamin’ny anarany fa tsy ho an’ny filan’ny fokonolona. Samy nanambara ny antony nanaovany ny fangatahana ny mpangataka ny tany roa tonta tamin’izany fotoana. Rehefa nandinika ela ny fitondram-panjakana dia nanome ny tany ho an’ny fiangonana tamin’ny taona 2012 satria ny an’ny fiangonana no mahakasika bebe kokoa ny fiarahamonina. Tsy afa-po tamin’ny fanapahan-kevitry ny fanjakana io ny mpangataka an-kilany ka nitondra ny raharaha teny anivon’ny fitsarana. Rehefa nandalo an-tanantohatry ny fitsarana samihafa ny raharaha dia mbola nahazo rariny hatrany ny fiangonana Androhibe Finoana.

Ny 3 jona 2015 ary dia namoaka didy fanomezan-dalàna laharana459- CUA/DS/CAB 15 hananganana ny tranon’ny fiangonana ny kaominin’Antananarivo Renivohitra ka nahatonga ny fihetsiketsehana nampanenoana zava-maneno nitabataba teo amin’ilay toerana tsy nisy na fanajana kely akory ny fotoam-pivavahana izay ataon’ny fiangonana teo akaiky teo.

Omaly tolak’andro dia tonga teny an-toerana ny solombavambahoakan’ny boriborintany faha 5 Naivo Raholidina nampanantena fa hanaraka akaiky ity raharaha ity mba hanomezana fampanantenana ireo mitsivalana amin’ny fanamboarana ny tranon’Andriamanitra ity. Maro ireto teny fanarabiana sy feno fandranitana milaza fa tsy tompon-tany eny Androhibe ireo mpivavaka ao amin’ny FLM Androhibe fa mpiavy avokoa ka tsy ilain’ny eny an-toerana.