Finoana

FJKM - Iarivo Avaradrano Nahazo fiofanana avy amin’ny CNaPS

Finoana
Alarobia 07 Martsa 2018

Notohizana teny amin’ny synodam-paritany Iarivo Avaradrano ny fiofanana mikasika ny fiahiana ara-tsosialy eo anivon’ny FJKM.

Tanjona, hoy Rasoanaivo Didier talen’ny fenitra sy ny fikarohana eo anivon’ny Tahirim-pirenena dia « mba tsy hisy olona very zo intsony eo anivon’ny sahan’ny FJKM fa mba samy hisitraka ny atao hoe fiahiana ara-tsosialy ny rehetra ». Midadasika ny synodam-paritany Iarivo Avaradrano ary raha ny rafitra ara-panjakana dia ahitana distrika dimy, miisa 122 ny fiangonana ary manana sekoly 22 ny synoda FJKM Iarivo Avradarano. Ankoatr’ireo dia misy 4 ny toeram-pitsaboana ary 1 kosa ny tobim-pifohazana. Ny mpiasa miantsehatra amin’ireo toerana ireo dia mpikambana CNaPS ny ankamaroany, hoy ny prezidà synodaly ny mpitandrina Rabetokotany Miarilaza Andriamialy. Ireo tsy tafiditra kosa dia ezahina ny hampidirana azy ho CNaPS aorian’izao fiofanana izao, hoy hatrany ny filohan’ny synoda Iarivo Avaradrano. Nampianarina ireo mpizaika niisa 400 mahery lalànan’ny asa, ny fifanekena arak’asa izay voafaritry ny fotoana na tsia, nyfampitsaharana ny fifanarahana arak’asa, ny lalàna mifehy ny fiahiana ara-tsosialy, ny adidin’ny mpampiasa eo anivon’ny CNaPS ary ireo karazana tombontsoa raisin’ny mpikambana toy ny fanampiana ny fianakaviana, ny fanampiana raha tra-doza na marary vokatry ny asa ary ny fisotroan-dronono.Ankoatra ny fampianarana dia nisy ny fotoana natokana ho amin’ny fifanakalozan-kevitra ka nipoitra nandritra ny fanontaniana sy ny valiny fa maro ny olana sedrain’ny mpiasa eo anivon’nysahan’ny FJKM. Betsaka no tsy mahalala fa mila angatahina avokoa ny fanampiana omen’ny CNaPS. Efa misy moa ny taratasy fenoina fotsiny atokana ho amin’izany. Ankoatr’izay dia misy ireo antontan-taratasy mila havaozina isan-taona mba hitohizan’ny zo raisina eo anivon’ny tahirim-pirenena.

RTT