Finoana

FJKM Foibe Nitondra am-bavaka ny Firenena

Finoana
Alatsinainy 20 Desambra 2010

Tetsy amin’ny FJKM Andravoahangy Fivavahana, omaly tolakandro no nitrotroan’ny FJKM Foibe am-bavaka ny firenena. Ny mpitandrina Lala Rasendrahasina, izay mitarika ny FJKM sy ny FFKM amin’ny taom-piasana 2011, no nitondra ny hafatry ny Tompo tamin’izany izay nifototra tamin’ny hoe “Sambatra ny firenena izay manana an’i Jehovah ho Andriamaniny”. Tamin’izany no nampitany fa hitan’ny Tompo ny sentom-pon’ny tsirairay. Mahalala ny ataony ny Tompo, hoy ihany izy. Ankoatra izay dia nitondrany fanazavana ihany koa ny momba ny teny hoe “miandry” sy “manantena” voasoratra ao amin’ny Baiboly. Tsy midika ho mipetra-potsiny ireo teny ireo, hoy izy satria hoe Andriamanitra no miasa. “Mila mijoro amin’ny fahamarinana ary tsy kivy isika mpino”, hoy ihany izy satria Jehovah no manome fandresena, hoy ihany ny filohan’ny Fjkm. “Mila fahatokiana an’i Jehovah ny fanavotana ny firenena”, hoy ny mpitandrina Lala Rasendrahasina. Ankoatra ny hafatry ny Tompo dia nisy koa ranombavaka natao ho an’ny firenena, ny fiangonana, ny vahoaka, izao tontolo izao, ireo firenena rehetra misedra fahasahiranana ankehitriny.

Nangonin’i Soa