Finoana

Filohan’ny FLM “Miantso fibebahana Andriamanitra !”

Finoana
Alarobia 27 Desambra 2017

Ao anatin’ny fankalazana ny jobily faha-150 taona nidiran’ny misionera sy ny antsoina hoe reformasionina teto Madagasikara isika amin’izao fotoana.

150 taona, hoy ny filohan’ny fiangonana loteranina Malagasy na ny FLM, Pastora Dr David Rakotonirina, ny atao hoe fibebahana sy famelan-keloka teto amintsika saingy toa nijanona ho teny filamatra fotsiny ihany. Vokatry ny tsy finoana sy ny ota ara-tsosialy izay maha tompon’andraikitra ny rehetra manomboka any amin’ny mpitondra ka hatrany amin’ny vahoaka no mahatonga antsika tahaka izao, raha ny hevitr’ity mpitondra fivavahana ity hatrany. Miantso fibebahana Andriamanitra manoloana ireo ota ara-tsosialy rehetra vitantsika teto toy ny kolikoly, ny fanondranana harena an-tsokosoko, ny tsy fandriampalemana, ny mizana mandainga ary ny fanambakana. Miantso fibebahana toy ny tamin’ny andron’i Jaona mpanao batisa ankehitriny ny Tompo ary tadidio fa tsy mandefitra amin’ireo minia manampi-tsofina amin’ny ota Andriamanitra ka nahatonga ireo loza nitranga toy ny safodrano, araka izay voalazan’ny baiboly ao amin’ny genesisy toko faha-6 sy faha-8. Ny manampahefana rehetra toy ny mpitondra, ny governora, ny mpanapaka ary ny mpitondra fiangonana hatramin’ny vahoaka, hoy hatrany ny tenany, dia nantsoina avokoa tamin’izany.

J. Mirija