Finoana

Filohan’ny FLM Lasa nitsabo tena any Frantsa

Finoana
Alatsinainy 19 Jona 2017

Lasa nitsabo tena any Frantsa ny sabotsy teo ny filohan’ny Fiangonana Loterana Malagasy, Rév David Rakotonirina.

Ny alin’ny 28 mey teo rehefa avy nanao fitsidiham-paritra tao Fianarantsoa no nanomboka tsy nahazo aina ity filoham-piangonana ity, raha ny fitantaran’ireo akaiky azy, ary dia nampidirina tao amin’ny hopitalin’Andranomadio. Mbola nitaraina ho nijafajafa anefa izy ka nakarina tao amin’ny hopitalin’Ambohibao indray ny ampitson’iny. Avy eo dia nalefa tao Nosy be indray saingy tsy fantatra ilay aretina, raha ny fanazavana hatrany, ka izao nalefa hotsaboina any Frantsa izao. Araka ny fitantaran’ireo akaiky azy dia mety ho fanapoizinana no nahazo ny Réverand satria ny fitiliana natao dia mampiseho fa efa potika ny vavony sy tsinainy kanefa tsy fantatra ny tena soritr’aretina. Lasa maramara be koa ny hodiny ny alin’io alahady 28 mey io, hoy izy ireo. Ny fitsirihana sy fizaham-pahasalamana lalina kokoa ihany moa no hahafantarana izay tena manjo ity raiamandreny am-panahy mitarika ny FLM ity. Raha ny fampitam-baovao farany, nanampy tamin’ny fandefasana hitsabo tena any andafy ity filohan’ny FLM ity ny filohan’ny repoblika, Hery Rajaonarimampianina sy ny filohan’ny Antenimieram-pirenena, Jean Max Rakotomamonjy. Tazana nanatitra azy teny Ivato ny depioten’Ambositra Hary Andrianarivo izay sady mpitahiry volan’ny birao foibe FLM.

Mirija