Finoana

Filohan’ny FJKM Miantso ny vahoaka hivavaka isan’ora

Finoana
Sabotsy 28 Martsa 2020

Manoloana izao areti-mandringana tafiditra eto anivon’ny tanin’ny repoblikan’i Madagasikara izao dia manao antso avo amin’ny vahoaka malagasy rehetra,

indrindra, ireo mpino Kristianina ny filohan’ny fiangonan’i Jesoa Kristy eto Madagasikara, Irako Andriamahazosoa Ammi, mba hitondra am-bavaka isan’ora ity firenena ity. Ny onjampeon’ny Radio Fahazavana izay raisina eo amin’ny mari-drefy 88.6 izay tantanan’ny FJKM rahateo moa no mitarika izany rojom-bavaka isan’ora izany, hoy ny fanazavany omaly. Hivavaka isika, hoy ny filohan’ny FJKM, mba hamindra fo amin’izao firenena izao Andriamanitra ka tsy hisy fiantraikany ratsy amin’ny firenena io areti-mandripaka io. Efa nanomboka omaly maraina tamin’ny 6 ora moa izay rojom-bavaka izay, raha ny fampitam-baovao hatrany.Marihina fa nampiato ny fanompoam-pivavahana any am-piangonana sy ny karazana fivoriana fanao mahazatra ny FJKM ho faajana ilay 15 andro fihibohana napetaky ny fanjakana ; mamporisika hatrany ny mpino kosa anefa mba hivavaka tsy tapaka isan-tokantrano noho ny finoana sy fanantenana fa Andriamanitra no tena vahaolana mahomby indrindra amin’ny olana miantraika amin’ny fiainan’olombelona.

J. Mirija