Finoana

Partagé sur :
• facebook

Tsy nanoina ny antson’ny Hetsiky ny Mpitondra Fivavahana, ny amin’ilay fifamelan-keloka teo amin’ny ankolafy efatra ny ankolafy Rajoelina sy Ratsiraka. Tonga ary nahafeno ny isa nilaina ny ankolafy Ravalomanana sy Zafy Albert.

Na izany aza dia nanapa-kevitra ny mpikarakara fa hahemotra ny dinika. Tsy tanteraka araka ny niheveran’ny mpanomana azy araka izany ilay fihaonana teny amin’ny foiben’ny Mpiara-mamaky Baiboly eny Mandriambero Ambohidratrimo. Fantatra kosa anefa fa hitohy ary hivelatra kokoa ny Hetsiky ny Mpitondra Fivavahana, ao anatin’ilay fandaharan’asa miditra amin’ny fifamelan-keloka. Ny 11 mey ho avy izao dia hisy ny fihaonambe hiantsoana ny hery velona rehetra hiroso amin’izay fifamelan-keloka izay. Hanerana ny lafy valon’ny Nosy ny fihaonana, araka ny vaovao. Raha ny fanazavana dia tsy nisy nitsipaka ireo vondron’olona efa natonin’ireto raiamandreny am-panahy ireto io hetsika lehibe io. Manomboka eto, dia mifantoka betsaka amin’ny fanomanana io fihaonambe io ny asan’ny Hetsiky ny Mpitondra Fivavahana. Etsy an-danin’izany, momba ny raharaha Ambohimamory, dia fantatra izao fa am-polony ireo tanora kristianina ao amin’ny Fjkm Ambohimamory no nandefasan’ny zandary taratasy fiantsoana hanaovana fanadihadiana. Manoloana izany dia manohitra ny fampihorohoroana amin’ny endriny rehetra ny Hmf. Nambaran’ireo mpitarika ity hetsika ity fa tsy ankolafy politika ny Ambohimamory fa miezaka mitaiza ny olona amin’ny fahamarinana, manaja ny fahamarinana. Raha tsiahivina moa, raha nanao hetsika ny Ambohimamory hatramin’izay dia nilamina mandrakariva izany satria, araka ny fanazavana, dia izay fahamarinana izay no laharam-pahamehana. 

Tia Tanindrazana

Samia mijoro ho an'i Gasikara.