Finoana

Fiatrehana ny Paska Hahazo fanampiana ireo sahirana eny Ambohidrapeto

Finoana
Talata 07 Aprily 2020

Hizara fanampiana ho an’ireo olona sahirana ara-pivelomana ao aminy ny kaominina Ambohidrapeto, tarihin’ny Ben’ny tanana Mihary Andriantsilavo amin’ity herinandro ity mialohan’ny hankalazana ny fetin’ny Paska.

Hanentana ireo vato nasondrotry ny tany sy ireo malala-tanana rehetra ao amin’ny kaominina misy azy ity Ben’ny tanana ity manomboka anio talata hangataka fanampiana hotsinjaraina amin’izy ireo. Tafiditra ao anatin’izany ny vatsy hiatrehana ny fihibohana mba tsy hisy tsy hanan-karotsaka ny isan-tokantrano mandrafoanan’ilay fihobohana 14 andro fanampiny vokatry ny fisian’ilay areti-mandoza coronavirus izay mandalo eto amintsika. Tsiahivina moa fa efa nizara tampim-bava miisa 1.200 ihany koa ny kaominina ho an’ireo vahoaka izay tratra sy ny zandarimariam-pirenena. Hametrahana bidon efa voavoatra hanasan-tanana 10 ihany koa isaky ny Fokontany hahafahana manazatra ny olona hanasa tanana amin’ny savony matetika ho fiarovana ilay coronavirus tsy hiparitaka. Marihina fa anisan’ny kaominina mbola mijaly rano hatreto Ambohidrapeto antony nanosika ity Ben’ny tanana ity hametraka ireo bidon maromaro ireo. Mikasika ny fanampiana avy amin’ny Fitondram-panjakana indray dia fantatra fa ho avy amin’ity herinandro ity ihany koa izany ho fitsinjovana ireo vahoaka tena sahirana isam-pokontany.

Pati