Finoana

Fetin’ny Pentekosta Nihena ireo olona namoy ny ainy sy naratra

Finoana
Alarobia 07 Jona 2017

Olona sivy no namoy ny ainy nandritra ny fetin’ny pentekosta lasa teo manerana ny nosy ka 2 tao amin’ny HJRA, raha ny vaovao azo tetsy amin’ny hopitaly HJRA.

Ny iray tamin’ireo matin’ny toaka, ny iray matin’ny lozam-pifamovoizana. Nihena io isa io raha oharina tamin’ny fetin’ny paska lasa teo. Toraka izany koa ireo naratra tamin’ny sabotsy, nahatratra 129, nidina ho 58 ny alahady ary nihena ho 50 ny alatsinainy. Mikasika ny tsy fandriampahalemana manokana dia jiolahy telo no saron’ny polisin’ny UIR ny alatsinainy alina tokony ho tamin’ny 9 ora sy sasany rehefa avy nanendaka mpivady teny Ankasina. Samy mitondra antsy lavalela anefa izy ireo ka ny tanan’ilay Rangahy an-kavia sy teo ambanin’ny maso an-kavanana no notsindronin’izy ireo tamin’ny antsy. Ilay Ramatoa kosa nodarodarohan’izy ireo ka saika voa mafy mihitsy. Nalain’izy ireo ny vola teny amin’ilay Rangahy sy ny gourmette volafotsy taorian’izay. Tonga teny an-toerana tampoka anefa ny polisin’ny UIR. Lehilahy roa no hitany nivoaka avy tamina elakela-trano iray ka nenjehin’izy ireo. Tafaporitsaka ny iray fa ny iray kosa nanambana hitoraka antsy ilay polisy. Mba ho fiarovan-tena dia nitifitra ity farany ka lavo ilay jiolahy izay fantatra fa tena avy nanafika ireto mpivady ireto mihitsy.

Pati