Finoana

Fetin’ny olo-masina Nety ny tsena ho an’ireo mpivarotra voninkazo

Finoana
Alakamisy 02 Novambra 2017

Na dia anisan’ireo fomba efa tranainy indrindra nahazatra aza ny fanateram-boninkazo eny amin’ny fasana rehefa fetin’ny olo-masina ny 1 novambra, mbola maro ireo nanatanteraka izany omaly.

Anisan’ireny ireo nanan-kavana matin’ny aretina pesta farany teo izay tsy azo nalevina tany am-pasan-drazana fa voatery nalefa teny Anjanahary. Toraka izany koa ireo efa nanao fangatahana ka tsy afaka nanao famadihan-drazana tamin’ity taona 2017 ity noho ny firongatry ny pesta. Somary netinety ny tsenan’ireo mpivarotra tetsy Anosy, raha araka ny fanadihadiana natao. 3.000 Ar sy 4.000 Ar rahateo dia efa nahazo ireny karazam-boninkazo amin’ny tavy efa maniry sy mamony tsara tarehy raha nisy ihany koa ireo nividy raozy fotsy sy mena tokana amin’ny vidiny 1.000 Ar isanisany ho an’ireo olona akaiky azy efa nodimandry. Nisy tamin’ireo mpanjifa no lasa lavitra mihitsy nanati-boninkazo omaly ary nisy ihany koa ireo nanamboatra fasana hiatrehana ny fotoam-pahavaratra sady nanatanteraka fiaraha-misakafo kely teny amin’ny fasana. Nisy koa ireo nanararaotra ny andro tsy fiasana omaly fotsiny nitondrana ireo fianakaviany nialavoly kely.

Pati