FETIN'NY PENTEKOSTA

Mitaky toe-po madio sy mahitsy, hoy Pastera Heritiana

Finoana
Talata 03 Jona 2025

Hankalazaina amin'ny Alahady 08 Jona ho avy izao ny fetin'ny Pentekosta amin'ity taona 2025 ity.

Raha araka ny fanazavan'ny Pastera Heritiana Randriarimalala dia fety tamin'ny andron'ny zanak'Israely izy io, natao hanompoana sy hiankohofana eo anatrehan'Andriamanitra. Miisa telo lehibe ireo fety ireo hoy izy ka ny fetin'ny Paska no nisantarana izany fahiny mitohy amin'ny fetin'ny Pentekosta ary ny fetin'ny tabernakely ny farany. Ho an'itsy faharoa dia nifanindry an-dalana tamin'ny fotoana nilatsahan'ny Fanahy masina izany tamin'ny andron'ny Apostoly ka lasa fety Kristianina. Mitaky toe-po madio sy mahitsy eo anatrehan'Andriamanitra ny fiatrehana izany raha araka ny fanazavany. Lalana roa kosa hoy izy no hahafahana mandray ny Fanahy masina dia ny fanoloran-tena ho an'Andriamanitra marina ary ny fandehanana mivavaka. Tena mivavaka miditra any am-piangonana mihitsy hoy izy mba hahazoana finoana lali-paka amin'ny alalan'ny toriteny. Tsiahivina moa fa fiangonana maro no efa manao fotoam-bavaka hiatrehana Io fetin'ny Pentekosta io amin'ity herinandro diavintsika ity.
Pati
Légende : Pastera Heritiana Randriarimalala mitaona hatrany ny olona mba hivavaka !