Finoana

Fanelanelanana ataon’ny FFKM Mbola mikatso aloha hatreto

Finoana
Alarobia 02 Mey 2018

Tsy mbola nisy ny hevitra nivoaka avy amin’ny fanelanelanana nataon’ny FFKM teo amin’ireo depiote manohana sy ny manohitra ny fitondrana.

Ry zareo avy amin’ny vondrona parlemantera HVM ihany no mbola nandefa solontena tamin’ilay dinika teny Vohipiraisana ny alatsinainy 30 aprily lasa teo. Nijanona teny amin’ny kianja 13 mey kosa ireo solombavambahoaka ho an’ny fanovana rehefa avy niera tamin’ny vahoaka satria ny hevitra tapaka sy nifanarahana dia ny hoe tsy hanatrika io fifampidinihana io. Anio alarobia no fantatra fa hivory indray ny komity mpikarakara eo anivon’ny FFKM ary rahampitso alakamisy no hanao tatitra amin’ireo filoham-piangonana efatra mirahalahy. Aorian’izay vao mety ho fantatra ny tohin’ny fandaharam-potoana. Mbola mikatso aloha izany ny fifampidinihana ary mametraka mazava ny mpanohitra fa ny fialan’ny filoham-pirenena no takian’izy ireo ary hihamafy hatrany ny hetsika fitakiana izay efa miparitaka manerana an’i Madagasikara, eny hatrany ivelany ihany koa aza fa tsy mijanona eto Antananarivo fotsiny.

RTT