Finoana

Partagé sur :
• facebook

Nanao fanambarana lehibe ny FFKM (Fiombonan’ny Fiangonana Kristianina eto Madagasikara) nandritra ny Ivon’ny Jobily fankalazana ny faha-50 taonan’ny FJKM tany Toamasina ny faran’ny herinandro.

 Ny fampiasanao ny zonao hifidy dia fandraisana andraikitra amin’ny fampandrosoana ka tandremo, tandremo ary tandremo ny tsy mifidy fa efa namoaka didy aman-dalàna ny tompon’andraiki-panjakana, hoy ny FFKM tamin’ny alalan’ny Pastora Rakotonirina David, Filohan’ny FLM. Mampahatsiahy ny FFKM fa hisy ny fifidianana fihodinana voalohany amin’ny 7 novambra, ary ny 19 desambra kosa ny fihodinana faharoa. Tanteraho ny adidintsika, ary aoka hotandrovina toy ny anakandriamaso ny fandalana sy ny fanajana ny fahamarinana fa raha sanatria misy tsy fitovian-kevitra, tsy fitoviam-pijery, tsy fitoviana fomba fiasa, fanaovana zavatra tsy marina, dia tsy zakan’ity firenena ity intsony ny miditra anaty korontana na krizy vaovao, hoy ny FFKM. Manao antso avo amin’ny tompon’andraiki-panjakana ihany koa dia ny ao amin’ny governemanta sy ny ao amin’ny CENI mba hotandrovina mihoatra ny anakandriamaso ny fitantanana ity fifidianana ity amin’ny fahamarinana manomboka amin’ny lisitra ka hatramin’ny famoahana ny vokatra. Manao antso avo amin’ny mpikamban’ny Fitsarana avo momba ny lalàmpanorenana (HCC) hitandro ny fitantanana ny fifidianana. Fifaninanana no hataonareo hahafahana mampandroso ny firenena ka aoka hifanaja sy hitandro ny hasorobidin’ity firenena ity, ka tsy hifandrafy fa hiezaka hitondra fampandrosoana ho an’i Madagasikara, hoy ny hafatra.

Toky R

Tia Tanindrazana

Samia mijoro ho an'i Gasikara.