Finoana

Partagé sur :
• facebook

Anisan’ny nanamarika ny famaranana ny faha-40 taona niorenan’ny S.T.K na ny “Sampana Tanora Kristianina” eo anivon’ny Sahan’ny fiangonana FJKM ny Asa soa ho an’ny tanànan’Antsirabe

Nisy, araka izany, ny fanadiovana ny zaridainan’Andranomafana sy ny tokotanin’ny kaominina Ambonivohitra ary ny fanolorana loko nilanja 25 kilao mba handokoana ny efitrano fisoratam-panambadiana ao amin’ny kaominina izany. Nialoha ny fihaonana moa dia nisy ny fivorian’ireo komity lehiben’ny S.T.K Foibe ny alakamisy sy ny zoma ka ny fanomanana ny tetikasa sy ny tetibola ho an’ny taona 2015 no nodinihina tamin’izany. Nambaran-dRtoa Rajaonarivelo Ony Finaritra,Tonian’ny S..K Foibe fa anisan’ny fanambin’izy ireo ho tsangambaton’ity faha-40 taona ity ny fametrahana ny “Base de Données” ho an’ny S.T.K Foibe ka ahafantarana marina ny isan’ireo mpikambana manerana ny Nosy sy ny hanorenana ihany koa ny foiben-toeran’ny S.T.K foibe ao Antananarivo ka handraisan’ireo tanora anjara vola 500 Ariary isam-batan’olona izany. Mpizaika nanodidina ny 2.000 teo ho eo no niatrika ity hetsika tao Antsirabe ity, izay avy tamin’ireo sahan’ny FJKM manerana ny Nosy ary ny tenin’Andriamanitra nalaina tao amin’ny Romana 13: 12 “Aoka hariantsika ny asan’ny Maizina ka hotafiantsika ny Mazava”, no niainan’ireo tanora tamin’izany. Nisy ihany koa ny diabe namakivaky ny tanànan’Antsirabe ny alahady nialoha ny fotoam-pivavahana famaranana tao amin’ny FJKM Ambohimandroso Filadelfia Avaratsena.

Tia Tanindrazana

Samia mijoro ho an'i Gasikara.