Finoana

Partagé sur :
• facebook

Mitombo isa hatrany ireo fiangonana mitory fahagagana sy fanasitranana eto amintsika. Ankoatra ny fotoana mahazatra isaky ny Sabotsy na Alahady dia marobe ireo mitory izany eny an-dalambe amin’ny andavanandro.

Raha araka ny fanazavan’ny pastera Heritiana Randriarimalala, tompon’andraikitra voalohany eo anivon’ny trano fivavahana Vahao ny oloko dia tsy ratsy ny fitoriana ny fahagagana sy ny fanasitranana. Tamin’ny fotoana nahatety an-tany an’i Jesosy aza mantsy hoy izy dia ny fahagagana nataony sy ny fanasitranana vitany no nahasarika olona maro taminy. Na izany aza anefa hoy hatrany ity pastera ity dia tsy handrefesana ny mari-drefin’ny fiangonana ny fisian’izany. Ny hahafantarana hoy izy fa tena fiangonana misy an’Andriamanitra ny fiangonana iray dia izy manova olona. Olona nilona tao anatin’ny fahazaran-dratsibe ohatra nefa afaka tanteraka. Olona ratsy fanahy be nefa lasa tsara saina sy matahotra an’Andriamanitra…Misy amin’ireo mitory ny fahagagana sy fanasitranana araka izany no nambarany fa misoloky. Mety misy amin’izy ireny hoy izy no hirahin’olona, misy koa ireo te-handresy lahatra olona fahatany fotsiny…. Mila mitandrina araka izany ny rehetra hoy izy. Mikasika ny resabe mandeha momba ny fara andro dia notsipihiny manokana fa tokony hiomana hatrany ny tsirairay. Na tsy tena ilay fara andron’izao tontolo izao aza mantsy hoy izy no tonga dia mety ho avy tampoka ny fahafatesana ilay fara andron’ny tsirairay ety an-tany.
Pati
Legende : Pastera Heritiana Randriarimalala, tompon’andraikitra voalohany eo anivon’ny trano fivavahana Vahao ny oloko !
 

Tia Tanindrazana

Samia mijoro ho an'i Gasikara.