Finoana

Partagé sur :
• facebook

Mitohy ny fanehoan’ireo mpitantana ny fiangonana zandriny ny hevitr’izy ireo manoloana ny raharaham-pirenena ankehitriny. Iray amin’ireo nanara-dia amin’izany indray ny Bishop Lalaina Andriamisolo avy amin’ny fiangonana FCT Mandroseza.

Manahirana ny resaka politika eto amintsika ankehitriny nefa ny tena tsy mpanao politika, hoy izy. Tsy azo atao anefa ny mangina . Misy fototra lalina mahatonga ny olana eto ka izay no hitsangananay miteny. Ambarako ary, hoy ity mpitondra fivavahana ity, fa mila miverina amin’ny ara-tantara isika ka mamantatra ny fady sy ny ozona samihafa mitoetra eto amin’ny firenena. Olana ara-panahy no misy eto ka vahaolana haingana hamantarana ny tena fototry ny olana io fiverenana amin’ny tantara marina io. Mifaningotra  mantsy ny zona sy ny fady misy eto. Sahiko koa ny manambara, hoy ity Bishop ity, fa matoa ny firenentsika anjakan’ny adilahy politika sy ny loza samihafa miverimberina tahaka izao, dia azo antoka fa misy ozona nitoetra efa hatramin’ny taloha elabe eto. Ozona izay tsy mbola voafaritra. Tsara hofantarina koa ireo fady misy eto amin’ny firenena, hoy izy,  ndrao nisy voadikan’ny mpitondra fanjakana na ny vahoaka izany ka io mandrendrika antsika isaky ny miarina io. Raha ny heviny, tokony hanatona na hampiantso mpahay tantara tany aloha be tany mihitsy ny mpitondra sy ireo tompon’andraiki-panjakana ankehitriny ka mamantatra ireo “ozona” sy “fady” eto amin’ny firenena. Avy amin’ny famaritana mazava ireo no hiaingana hirosoana amin’ny vahaolana hanafahana ny firenena ao anatin’izao hantsana lalina izao. Nohamafisiny fa mpivavaka ary mahalala an’Andriamanitra avokoa ireo mpanao politika sy mpitondra eto Madagasikara, saingy mila mamaha ny olana ara-panahy izay fatoran’ireo ozona sy fady voadika ireo.

Ntsoavina Evariste

Tia Tanindrazana

Samia mijoro ho an'i Gasikara.