Finoana

Arrupe Faravohitra “Foanana amin’ny fomba Kristianina ny herisetra”

Finoana
Alakamisy 26 Novambra 2020

Nirongatra tato ho ato ny herisetra atao amin’ny vehivavy na dia efa nisy foana aza tato ho ato,

hoy ny Mompera Siprien Medar Razafindrainy, talen’ny ivon-toerana Arrupe Madagascar. Tanjon’ny Arrupe ny hanafoana izany amin’ny fomba Kristianina satria fikambanana Kristianina izahay. Dingana fahatelo amin’izay famongorana izay no natomboka anio (TTF: omaly) satria natomboka tamin’ny fampiofanana mikasika ny fomba hiadiana amin’izany no natao voalohany. Taorian’izay dia nampihatra ny fiofanana noraisiny tamin’ireo toerana nisy azy manerana ny nosy ireo mpiofana. Ankehitriny dia miditra amin’ny fanangonana traikefa momba izay fampiharana izay sy ny zava-baovao misy eo amin’ity resaka herisetra atao amin’ny vehivavy ity no natao tetsy amin’ny Arrupe Faravohitra. Miisa 50 teo moa ireo mpizaika ary isan’ny tsikaritra ho nampirongatra ny herisetra, raha ny fanazavana hatrany, ny fivoizan’ny haino aman-jery ilay tranga. Mila mametraka tsindry ihany koa anefa ny haino aman-jery mba tsy hisy intsony ny hoe maty I Ratsimandrava dia vitavita fotsiny any, may ny rova dia vitavita fotsiny any, voaolana ny zaza dia vitavita fotsiny ihany fa mila ampiharina ny lalana satria mba tany tan-dalana ihany isika, hoy hatrany ny Arrupe.

J. Mirija

Legende: Ireo mpizaika tetsy amin’ny Arrupe