Finoana

Antso fiarahamonina Kristianina “Andao hanangana fiarahamonina tsy mifanambaka”

Finoana
Alakamisy 12 Novambra 2020

Andao hanangana fiarahamonina tsy mifanambaka fa azo atao eto izany, hoy ry zareo eo anivon’ny vovonana Antso fiarahamonina Kristianina na CRF-AFK

nandritry ny fampahafantarana ny boky faha 5 famoakan’izy ireo isam-bolana tao anatin’izay 5 volana izay mba hitondrana vahaolana eto amin’ny firenena, tetsy amin’ny foibeny etsy Alarobia. Araka ny fanazavan’ny filoha sady mpanoratra ireo boky, Ricky Andriamparany, dia mbola misy boky 3 hafa hivoaka aorian’ity nampitondrana ny lohateny hoe “La richesse des nations: d’abord l’être humain, puis la nature, enfin le reste” ity. Izany hoe 8 no fitambarany. Hiato kely, hoy izy, rehefa tonga eo amin’ny boky faha 7 satria ilaina ny fandinihana ny efa vita amin’ny alalan’ny filankevim-pirenena amin’ny sehatra rehetra. Matoa natsangana ny AFK dia satria tsy mahay miara-monina ny Kristianina. Mifampitsikitsiky sy mifanoroka any am-piangonana fa mipatitaka kosa rehefa resaka fandraharahana, izany hoe, vola. Ity boky faha 5 ity, araka ny lohanteny nomena azy dia natao hanehoana fa ny olombelona no harem-pirenena voalohany. Ny natiora avy eo. Ny hafa rehetra aoriana. Hita ao anatin’ireo boky 5 sy izay ho avy manaraka, hoy ny AFK, fa azo ampiharina eto ny fiarahamonina tsy mifanambaka, tsy mifampitsetsitra ary mifampivelatra raha ankatoavintsika. Isan’ny olan’ny toekarem-pirenena, raha ny nambaran’ny mpanoratra, ny tsy fisiana rafitra mitantam-bola eto amintsika. Miankin-doha amin’ny vola vahiny isika nefa afaka mamorona vola eto an-toerana ihany, hoy izy.

J. Mirija

Legende: Ny filohan’ny AFK