Finoana

Antoko mpihira Taratry ny Mazava Hanatanteraka seho ao amin’ny FJKM Anjohy

Finoana
Alatsinainy 19 Jona 2017

Taorian’ilay fampisehoana goavana nanamarihan’ny antoko mpihira Taratry ny Mazava eo anivon’ny fiangonana FJKM Ambohidanerana ny voka-dehibe tetsy amin’ny Sainte Famille Mahamasina farany teo dia fantatra fa hanatontosa fampisehoana ao amin’ny FJKM Anjohy indray izy ireo ny 02 jolay ho avy izao.

Haharitra ora roa eo ho eo ny fampisehoana, raha araka ny fanazavan’ny prezida Ihary, filohan’ny antoko izay hiompana amin’ny fisaorana sy fiderana an’Andriamanitra ranofotsiny. Raha araka ny fantatra tokoa mantsy dia efa mahatratra 60 isa ankehitriny ny hiran’ity antoko mpihira iray ity. Misy amin’izy ireo no efa voarakitra anaty kapila mangirana toy ny volume 2 raha efa an-dalam-pikarakarana kosa ny volume 3. Miantso antsika rehetra mba ho avy hanotrona azy ireo ity antoko mpihira ity araka izany, indrindra fa ny any amin’iny faritra Ankazondandy ity. Mbola hitohy ao Ambohidanerana moa izany fampisehoana hataon’ny antoko Taratry ny Mazava izany ny 26 jolay ho avy izao.

Pati