Fifamoivoizana

Zotram-pitaterana Suburbaine Ambohimanambola Tsy nivoatra na dia efa 600 ariary aza ny saran-dalana

Fifamoivoizana
Zoma 02 Novambra 2018

Raha vao mikenonkenona ny hampakatra saran-dalana ny zotra suburbaine sasany manodidina an’Antananarivo, ny an’ny zotra mampitohy an’Ambohimanambola-Ambohijatovo kosa dia efa tamin’ny faha-15 oktobra lasa teo no nanjary 600 ariary ny saran-dalana mampitohy an’ireo toerana roa ireo.

Lasa 400 ariary kosa ny tapa-dalana Ambohimanambola-Ankadindratombo sy ny mifanohitra amin’izay ary koa ny Ankadindratombo-Ambohijatovo Ambony sy ny mifanohitra amin’izay koa. Raha ambara fa misy kaoperativam-pitateraa 8 ao amin’ity zotra suburbaine iray ity dia fantatra kosa dia tena iray ihany izy ireo na dia mody misy I, J sy hafa koa aza. Tsy dia nisy ny fimenomenomana be tamin’ireo mpanjifa avy any amin’ity tanàna ity satria vao nasondrotry ny zotra urbaine Antananarivo-Renivohitra ho 500 ariary ny saran-dalany dia efa nanampo an’ireo fisondrotana 600 ariary ny teny Ambohimanambola. Ny mahavariana anefa na dia efa mba misondrotra koa aza ny versements azon’ireo taksibe eny an-toerana dia tsapa ho tsy dia nitondra fanovana n’inona n’inona teo amin’ny fomba fiasan’ireo zotra ireo izany fa azo lazaina fa ny teo ihany no teo. Mbola filaharam-be isan’andro eny Ambohimanambola sy eny Ambohijatovo Ambony ary hankisisika hatrany ny eo Ankadindratombo.

Ntsoavina Evariste