Fifamoivoizana

Zotra F - Andoharanofotsy Tafakatra 1.000 Ar ny saran-dalana amin’ny hariva

Fifamoivoizana
Alarobia 03 Oktobra 2018

Raha efa mba milamindamina kely ny fiaraha-miasan’ny mponina amin’ireo taksibe sasany eny Andoharanofotsy toy ny zotra 172, 187 ary ny 137 dia mampitaraina fatratra azy ireo indray ny hafitsoky ny zotra F mandalo eny an-toerana.

Amin’ny 4 ora hariva mantsy dia efa tsy mandray ireo mpandeha ao Andoharanofotsy intsony izy ireo fa avy hatrany dia mamakivaky ny By-pass avokoa, raha araka ny fitarainana voarain’ny Ben’ny tanàna. Raha misy mandray aza dia tafakatra hatrany amin’ny 1.000 Ar ny saran-dalana ka misy amin’ireo mpandeha no voatery manao dia an-tongotra rehefa tsy manana an’izay. Rehefa mba nitaraina tany amin’ny antokon-draharaha misahana ny fitaterana an-tanety na ny ATT anefa ny Ben’ny tanànan’Andoharanofotsy Ranirison Hasina mikasika io tranga io dia fantatra fa tsy nahazo valin-teny mahafa-po ny tenany. Tsy faly amin’ireo zotra tsy manara-dalàna ireo mihitsy ny “Structure Local de Concertation” ( CLS) ao amin’ity kaominina iray ity izay marihina fa hivondronana olobe sy manampahaizana maro. Miantso ny mba hisian’ny fiaraha-miasa ao amin’ny ATT sy ny kaominina ny tenany hahafahana mandrindra ny fifamoivoizana eny an-toerana. Tsiahivina fa efa nahazo fiofanana avokoa ireo mpamily sy mpanampy ireo. Nampahafantarina ny tompon’ny fiara ihany koa ny momba ny bokin’andraikitra.