Fifamoivoizana

Voafitaka ny vahoakan’i Faratsiho Tsy hisy indray ny asa fanamboaran-dalana

Fifamoivoizana
Alatsinainy 30 Aprily 2018

Any Ampefy mandalo Soavinandriana sisa amin’izao no lalana hahafahana miditra ao Faratsiho, Faritra Vakinankaratra. Potika tanteraka mantsy ny lalana avy any Sambaina, lalam-pirenena fahafito mihazo an’ity distrika iray ity rehefa tsy nisy fanamboarana an-taonany maro.

Mahatsiaro ho sahirana ireo tantsaha mpamokatra any an-toerana vokatr’izany amin’ny famoaham-bokatra. Ho an’ireo marary mila fitsaboana maika tsy maintsy hoentina any Antsirabe moa dia mamoy ny ainy eny an-dalana ny ankamaroan’izy ireny. Nampanantena ny hanamboatra ny lalana mampitohy an’i Sambaina sy Faratsiho ny fitondrana mijoro ankehitriny saingy toa nivadika izy ireo. Raha araka ny loharanom-baovao voaray avy any an-toerana dia efa nakarina eto an-drenivohitra indray ireo fiara lehibe mpanamboatra lalana saika hanamboatra io lalana io noho ny antony tsy fantatra. Maromaro ihany izy ireo raha ny loharanom-baovao ary tsy nisy niverina intsony. Mahatsiaro voafitaka ireo vahoakan’i Faratsiho ka andrasana izay mety ho tohin’ny raharaha.

Pati